Írısqı nesiybemizdi órtten asırayıq!
Házirgi waqıtta respublikamızda biyday orıw jumısları baslanıw aldında, miynetkesh diyxanlarımızdıń miynetiniń arqasında jetilistirilgen biyday ónimin tolıq jıynap alıw házirgi kunniń aldaǵı wazıypalarınan biri esaplanadı. Bunda ırısqı-nesiybemizdi hár qanday apattan, órt qáwipinen saqlaw hár bir insannıń wazıypasına aylanıwı tiyis.
Taxtakópir rayonı Ayrıqsha jaǵdaylar bólimi xızmetkerleri tárepinen mashina traktor parkleriniń qániygeleri menen orım-jıyınǵa qatnasatuǵın texnikalardıń máwsimge sazlıǵın bir qatar kózden ótkerildi. Dán jıynaw kombayınları, avtomashinalar, traktor tirkemeleri hám basqa da orım-jıyımǵa qatnastırılatuǵın mexanizmlerdiń jumıs islew jaǵdayları bir qatar tekserip kórildi. Usı kózden ótkeriw dáwirinde olardıń órt óshiriwde qollanılatuǵın arnawlı úskene, ásbaplarınan, ásirese ushqın óshirgishlerinen támiyinleniwindegi anıqlanǵan geypara kemshiliklerdi, orım-jıyım mapazında boldırmawdıń hámme sharaların támiyinlew tuwralı bir qatar tapsırmalar hám kórsetpeler berildi.
Orım-jıyım dáwirinde usı mapazǵa qatnastırılatuǵın mexanizmlerdiń órt óshiriw quralları menen, ásirese kútilmegen jaǵdayda órt payda bolǵanda, olardıń komplektlengen quralları menen támiyinlewine ayrıqsha dıqqat bóliw tapsırıldı. Biyday orıw waqtında kombaynnıń aylanba mexanizmleriniń qızıp ketiwi, olarǵa saban oralıp qalıwı da órtti payda etedi. Sonıń ushın kombayı aydawshıları ózleri texnikaların tez-tezden qadaǵalap turıwı, waqtı-waqtı menen texnikanı toqtatıp, oralıp turǵan shóp-sharlardı alıp taslawı tiyis. Hár bir texnikada órt óshiriw quralları menen jeterli dárejede támiyinleniwi maqsetke muwapıq boladı. Yaǵnıy kombaynnıń ózinde 2 órt óshirgish, 2 bel, 2x2 metr kiyiz yamasa brezent, 40-100 litr suw, 2 shelek bolıwı kerek. Bunnan basqa da orılıp atırǵan biyday atızınıń shetinde súrim traktor bolıwı kerek.
Dán saqlaw qırmanlarda órt ásirese elektr tarmaqlarınıń nasaz bolıwınan, shılım shegiwden kelip shıǵadı. Usı hadiyselerdiń aldın alıw ushın birinshi gezekte isshi-xızmetkerler órt qáwipsizligi boyınsha tusiniklerge iye bolıwı tiyis. Dán saqlaw qırmanların órtke qarsı keminde eki danadan bolıwı, átirapında suw toltırılǵan bochka hám qum toltırılǵan qutılar hámme waqıtta bolıwı shárt.
Joqarıda aytılǵan kemshiliklerge jol qoymaw, órt qáwipsizligi qaǵıydalarına qatań ámel etiw miynetkesh diyqanlarımızdıń jetistirgen biyday ónimin zıyansız jıynap alınıwına úlken járdem boladı.
Dastan Allaberganov
Taxtakopir rayonı AJB baslıǵı
