Shańaraq – muqaddes qorǵan

Shańaraq-bul mámleket ishindegi kishkene mámleket esaplanadı. Shańaraq ázel-azelden múqaddes qorǵan sanalǵan. Insan shańaraqta dúnyaǵa keledi,  úlkeyip kamal tabadı. Bárinen burın shańaraq bekkem,  tınısh bolsa jámiyet turaqlı boladı. Ósip atırǵan perzentler hár tárepleme bárkámal bolıwına múmkinshilik jaratıladı.

Búgingi kúnde eń aktual máselelerden biri,  bul – erte nekeler,  jas jigit-qızlardıń shańaraq qurıwǵa tayın emesligi,  aǵayin- tuwısqanlar ortasındaǵı quda táreptiń aǵayinshilik mashqalası bolıp tabıladı. Sonıń menen birge,  shańaraqqa tiyisli kelispewshilikler,  óz-ara jánjeller aqıbetinde jas shańaraqlardıń buzılip ketiwi de uwayım oyatadı. Erte nekelerdiń aldın alıw,  jaslardı shańaraq qurıwǵa tayarlaw,  qáyinene-kelinler ortasındaǵı kelispewshiliklerge jol qoymaw boyınsha shańaraqtıń jası úlkenleri,  qońsı-qobalar menen bir qatarda máhálle belsendileri,  aqsaqalları sonıń menen birge PHAJ bólimi xızmetkerleri sherikliginde qatar jumıslar ámelge asırılıp atır. Máhállelerde,  kásip-óner kolledjlerinde hám kárxana,  shólkemlerde jıynalıslar ótkerilip,  joqarıdaǵı máseleler haqqında dóńgelek stol sáwbetleri ótkerilmekte. Sonıń menen birge“Jaslardı shańaraqlıq turmısqa tayarlaw oqıworayı”nıń jas shańaraq qurıwshılar menen oqıw-shınıǵıwları alıp barılmaqta.
Shańaraqta ruwxıy ortalıqtıń qáliplesiwinde áke hám analardıń bólek orınları bar. Ásirese,  perzentlerdi shańaraqqa tayarlaw boyınsha “Qus uyasında kórgenin isleydi”,  degen sıyaqlı,  áwele,  ata-analardıń ózleri tatıw bolıp jasawı,  perzentlerge ibrat kórsetiwleri zárúr. Úlkenlerge húrmet-izzet kórsetiw,  olardıń aldında ádep saqlaw,  duwasın alıw ata-babalarımızdan bizge miyras bolıp kelip atır. Mine sol dástúrler,  qádiriyatlarǵa ámel etip jasawımız,  jetkinshekti ádep-ikramlıqqa úyretiwimiz kerek. Qalabersa,  qáyinene hám qáyinatalar da shańaraqqa kelin bolıp kelgen jas kelinshekke óz perzentleri sıyaqlı múnásábette bolıp,  mehir kórsetiwi,  onı óz perzenti sıyaqlı qabıllawı,  shańaraqtı júrgiziwge úyretiwi kerek emespe? Óytkeni,  kelin de birewdiń aq juwıp,  aq tarap ósirgen perzenti.
Neke múnásábetleri qanshelli ıqtıyarıy,  sonıń menen birge,  nızam talaplarına tiykarlanǵan halda bolsa,  álbette,  sol shańaraqtıń poziciyası,  abıray –itibarı bálent boladı. Áne sonday shańaraq perzentleri bolsa kámil insan bolıp úlkeyedi. PHAJ bólimlerine úlken árman hám niyetler menen kirip kiyatırǵan jigit-qızlar ózleri qurıp atırǵan shańaraq-jámiyetiniń bir bólegi ekenligin esten shıǵarmawları kerek. 
Hár bir insan ushın eń úlken baxıt shańaraqqa tiyisli párawanlıq bolıp tabıladı. Shańaraǵınan,  perzentlerinen kewli toq insannıń jumısında ónim hám bereket boladı.
Shańaraq salamat eken – jámiyet bekkem,  jámiyet bekkem eken mámleket turaqlı bolıp tabıladı.

Sımbat Baxtıberlieva
Taxtakópir rayonlıq PHAJ bóliminiń 1-dárejeli inspektorı