HÁR BIR MÚRÁJAT NÁZERIMIZDE
Bızge kelip atırǵan hár bir múrájat qadaǵalawǵa alınǵan. Sebebi onda puqaranıń orınlanbaǵan arzıw-úmitleri, huqıqınıń shekleniwi yaki basqa da narazılıqları boladı. Rayonda jasawshı puqara A.K. rayonlıq ádillik bólimine arza menen múrájat etti. Ol óz múrájatında 1995-jıldan baslap 2022-jılǵa shekem Respublikalıq oba, profilaktikalıq orayı Qaraqalpaqstan Respublikası filialı rayonlıq bóliminde túrli lawazımlarda islegenligin, biraq bul boyınsha jumıs ornınıń attestaciyadan ótkerilmegenligi sebepli zıyanlı hám awır jumıslar qatarına kirgizilmegenin bildirip, joqarıdaǵı dáwir dawamında zıyanlı hám awır jumıslarda islegenligi haqqındaǵı faktın sud arqalı tastıyıqlap beriwde ámeliy járdem soraǵan.
Anıqlanıwınsha, puqara byudjetten tısqarı pensiya qorı rayonlıq bólimine jeńilletilgen jasqa tiyisli pensiyaǵa shıǵıw ushın múrájat etkenin, biraq komissiya qararına muwapıq, jeńilletilgen pensiya alıw huqıqın beriwshi ayırım jumıs dáwirleri boyınsha jumıs ornı attestaciyadan ótkerilmegenligi sebepli, puqaraǵa jeńilletilgen pensiya tayınlawdan bas tartılǵan.
Negizinde, Ózbekstan Respublikasınıń «Puqaralardıń mámleketlik pensiya támiynatı haqqında»ǵı Nızamında ulıwmalıq belgilengen jastı 10 jılǵa qısqarttırılǵan halda jeńilletilgen pensiya alıw huqıqına miynet shárayatı júdá zıyanlı hám júdá awır jumıslarda tolıq jumıs kúni dawamında bánt bolǵan xızmetkerler-hayallar is stajı keminde 20 jıl bolıp, sonnan keminde 10 jıl kórsetilip ótilgen jumıslarǵa tuwrı kelgen jaǵdayda iye bolatuǵını belgilengen.
Ózbekstan Respublikası Joqarı sud plenumınıń 2017-jıl 29-noyabr kúngi «Mámleketlik pensiya támiynatı menen baylanıslı isler boyınsha sud ámeliyatı haqqında»ǵı qararına muwapıq, jumıs orınlarınıń attestaciyadan ótkergenligi haqqındaǵı hújjetler bolmaǵan jaǵdayda, júdá zıyanlı hám júdá qáwipli miynet shárayatlarında islegenligi faktın belgilew haqqındaǵı isler sudta kóriliwi múmkin.
Usıǵan muwapıq, rayonlıq ádillik bólimi tárepinen puqaralıq isleri boyınsha Shımbay rayonlar aralıq sudına puqara A.K.nıń 1995-jıldan 2022-jılǵa shekem zıyanlı hám júdá awır jumısta islegenligi faktın belgilep beriw haqqında arza kirgiziliwi nátiyjesinde shıǵarılǵan sudtıń sheshiwshi qararına tiykarlanıp, puqara A.K.nıń zıyanlı hám awır jumıslarda islegenligi faktı tastıyıqlandı. Nátiyjede, oǵan jeńilletilgen pensiya tayınlanıwına erisildi.
Axmet ALLAMURATOV
Rayonlıq ádillik bóliminiń baslıǵı
