MÁMLEKETIMIZDE ÁDILLIK HÁM HUQÍQ ÚSTINLIGIN TÁMIYINLEW
Xalıqqa professional xızmet etetuǵın ıqsham hám nátiyjeli basqarıwdı jaratıw, deklarativ túske iye bolǵan wazıypalardı biykar etiw, funkciyalardı ámelge asırıwdıń shólkemlestiriwshilik-huqıqıy mexanizmlerin anıq belgilew maqsetinde PHAJ bólimi hám onıń aymaqlıq basqarmaları Ózbekstan Respublikası Prezidentiniń 2022-jıl 17-mart kúngi 89-sanlı Pármanı tiykarında Ádillik Ministrligi quramına qosıldı. Keltirip ótilgen Párman talaplarına tiykarlanıp rayonlıq PHAJ bólimi tárepinen xalqımızǵa innovaciyalıq mámleketlik xızmetler, yaǵnıy tiykarǵı tórt háreket tuwılǵanlıqtı dizimge alıw, neke dúzilgenligi haqqında akt jazıwların dizimge alıw hám ajırasqanlıq, ólim haqqındaǵı akt jazıwların dizimge alıw boyınsha bir qansha xızmetler kórsetildi. Atap aytqanda, 2022-jıl dawamında rayonlıq PHAJ bóliminde 631 tuwılıw, 216 neke, 88 ajırasqanlıq hám 276 ólim haqqındaǵı akt jazıwları dizimge alındı. Rayonlıq PHAJ bóliminde, Ózbekstan Respublikası Ministrler Kabinetiniń 2020-jıl 10-noyabrdegi 704-sanlı qararına tiykarlanıp, Kompleks mámleketlik xızmetlerdi kórsetiw tártibi tiykarında rayonlıq PHAJ bólimi arxivinde 1935-jıldan usı kúnge shekem saqlanıp atırǵan tuwılıw, neke, ólim hám nekeden ajırasqanlıq haqqında akt jazıwları, birden-bir elektron arxivine tolıq kirgizildi hám tuwılǵanlıq haqqındaǵı akt jazıwları qayta tekserilip shıǵıldı. Sonday-aq, bólim tárepinen puqaralardıń alısın jaqın etiw, puqaralardıń múrájatın tıńlaw, máselelerge sol orınnıń ózinde sheshim tabıw, alıs-aymaqlarǵa shıqqan halda, kóshpeli tártipte kóshpeli xızmetler búgingi kúnge shekem dawam etpekte.
Mámleketimizde jańa qabıl etilgen qararlar, pármanlar menen tanıstırıw, olardıń mazmun-mánisin túsindiriw, xalqımız arasında keń en jaydırıw, xalıqtıń huqıqıy mádeniyatın jetilistiriw maqsetinde bir qansha túsinik jumısları alıp barıldı. Rayon aymaǵında hám alıs jerlerinde jaylasqan awıl puqaralar jıyınlarında, atap aytqanda A.Adilov atındaǵı APJda Ózbekstan Respublikası Ministrler Kabinetiniń 365-sanlı qararı boyınsha jaslar arasında túsinik jumısların alıp barıw, xalıqtıń medicinalıq mádeniyatın asırıw boyınsha jıynalıs bolıp ótti. Rayonlıq PHAJ bólimi inspektorları tárepinen aymaq turǵınlarına medicinalıq mádeniyatın asırıw, onıń tártibi haqqında jaslarǵa túsinik jumısları alıp bardı. Nekeleniwshi shaxslardıń nekeden ótiwden aldın ózleriniń jasaw jayındaǵı 5 turli kesellik yaǵnıy psixikalıq, narkologiyalıq, teri kesellikleri, tuberkulyoz hám spid kesellikleri boyınsha medicinalıq kórikten ótiwi shárt ekenligin túsindirip ótti.
Múlk APJ, Marjankól APJda máhálle hám shańaraqtı qollap-quwatlaw bólimi hám barlıq puqaralar jıyınınıń hayal-qızlar shańaraq hám sociallıq-ruwxıy máseleler boyınsha qánigeler menen birgelikte ajırasıwlar sanın azaytıw boyınsha óz-ara kelispewshiligi hám olardı jarastırıw haqqında jıynalıs bolıp ótti. Ajırasıwlardıń sanın azaytıw boyınsha ajırasıw jaǵasında turǵan shańaraqlardı jarastırıw, boldırmaw maqsetinde tiyisli qániygeler hám rayonlıq PHAJ bólimi baslıǵı qatnasıwında jıynalıs bolıp ótti. Máhálle hám shańaraqtı qollap-quwatlaw bólimi qánigeleri hám huqıq qorǵaw qánigeleri menen birgelikte «Biz korrupciyaǵa qarsımız» uranı tiykarında keshe bolıp óttı. Keshede rayonlıq PHAJ bólimi baslıǵı tárepinen korrupciyanıń aldın alıw, onıń kelip shıǵıw sebepleri, korrupciyanı boldırmaw haqqında túsinik berip ótti. Korrupciyanıń aldın alıw boyınsha islenip atırǵan jumıslar mısallar tiykarında aytıp ótildi. Sonıń menen bir qatarda PHAJ tarawındaǵı ózgerisler, qararlar puqaralarımızǵa jaratılıp atırǵan qolaylıqlardı keń jámiyetshilikke jetkeriw maqsetinde, arnawlı veb-saytlarda, ǵalaba xabar quralları bolǵan televidenie, radio esittiriwleri hám gazetalarda maqala shıǵarıw arqalı hár ayda maǵlıwmat berip barıladı.
A.Sagindikova
Rayonlıq PHAJ bólimi baslıǵı
