Jer uchastkaların menshiklestiriw boyınsha mámleketlik xızmetti kórsetiw tártibi belgilendi

Húkimet qararı menen Ózbekstan puqaraları hám yuridikalıq shaxslarına turaqlı paydalanıw (iyelik etiw), ijara hám miyras etip qaldırılatuǵın ómirlik iyelik etiw huqıqı tiykarında tiyisli bolǵan jer uchastkaların menshiklestiriw boyınsha mámleketlik xızmetlerdi kórsetiwge baylanıslı hákimshilik reglamenti tastıyıqlandı.

Jer uchastkaların menshiklestiriw boyınsha mámleketlik xızmetler Mámleketlik xızmetleri orayları yáki Birden-bir interaktiv mámleketlik xızmetleri portalı (my.gov.uz) arqalı kórsetiledi. Bunda arza toltırılıp, oǵan tómendegiler qosımsha etiledi: isenim xat (arza beriwshiniń wákili múrájat etkende); jer uchastkasın menshiklestiriw haqqında qarar (arza beriwshi – yuridikalıq shaxs bolsa).
Mámleketlik xızmetlerdi kórsetiw ushın bazalıq esaplaw muǵdarınıń 10% muǵdarında jıyım óndiriledi. Birden-bir interaktiv mámleketlik xızmetler portalı (my.gov.uz) arqalı xızmet kórsetilgende jıyım muǵdarı joqarıda kórsetilgen muǵdardıń 90% muǵdarında jıyım óndiriledi.
Arza rayon (qala) qurılıs bólimi, kadastr filialı tárepinen kórip shıǵılıwı ushın “Yerxususiylashtirish” sistemasına jiberiledi. Kadastr filialı arza túsken kúnnen 5 jumıs kúninde maǵlıwmatlardı tekseredi.
Rayon (qala) qurılıs bólimi 3 jumıs kúninde jer jaylasqan aymaqtıń (xalıq jasaw ornı yáki olar arasındaǵı aymaqtı) rawajlandırıwdı qalasazlıq tárepinen jobalastırıw haqqındaǵı hámde olardı qurıw haqqındaǵı tastıyıqlanǵan hújjetlerge jer uchastkası jaylasıwınıń muwapıqlıǵın kórip shıǵadı.
“Yerxususiylashtirish” sistemasında arza nátiyjeleri boyınsha (kelisilgeni yaki bas tartılǵanı) xabarnama tayarlap, arza beriwshige jiberiledi. Usıǵan muwapıq, arza beriwshi 10 jumıs kúninde jerdi satıp alıw tólemin ámelge asıradı. Tólem óz waqtında tólengende, jerge múlik huqıqın beriwshi mámleketlik order qáliplestiriledi.
Kadastr basqarması order tiykarında 2 jumıs kúninde jerge bolgan huqıqtı mámleketlik dizimnen otkeredi hám onıń kóshirmesin arza beriwshige yaki Mámleketlik xızmetler oraylarına jiberedi.
Jıyımlar hám menshiklestirilip atırǵan jer uchastkasınıń satıp alıw bahası tólengenliginiń tastıyıqlanıwı “Yerxususiylashtirish” sisteması arqalı ámelge asırıladı. Reglament kishi sanaat, jaslar sanaat hám isbilermenlik zonaları qatnasıwshılarına berilgen jer uchastkalarına qollanılmaydı.

P.Reymkulov         

Taxtakópir rayonlıq   Ádillik bólimi 
Mámleketlik xızmetler orayı direktorı