Puqaralarda mámlekettiń sosiallıq-ekonomikalıq siyasatına tásir etiw múmkinshiligi payda boladı
Xalıqtı dizimge alıw, áwele, mámleket yamasa húkimet emes, bálkim jámiettiiń ózi ushın zárúr bolıp, ol waqıtı -waqıtı menen óz-ózin aynada kóriw arqalı rawajlanıw nátiyjelerin bahalaw múmkinshiligi bolıp tabıladı. Bul ilájda qatnasıp atırǵan hár bir puqara ózi haqqındaǵı maǵlıwmatlardı usınıs ete otırıp, ózleri tiyisli bolǵan adamlar toparına tiyisli sosial programmalardı islep shıǵıwda qatnasadı.
Mısal ushın, jumıssızlardıń sorawnamadaǵı juwapları miynet bazarın úyreniw, atap aytqanda kerekli orında jańa jumıs orınların jaratıw imkaniyatın berse, balalar sanı tuwrısındaǵı maǵlıwmatlar mektep, mektepke shekemgi bilimlendiriw shólkemleri hám sol sıyaqlı saraylar qurılısı jobaların dúziwde qol keledi. Jası haqqındaǵı maǵlıwmatlar pensiyaǵa shıǵıwshılar sanı, olardıń pensiya tólewleri ushın zárúr bolatuǵın qarjılardı jamǵarıp barıw imkaniyatın beredi. Mektepke shekemgi bilimlendiriw, ulıwma bilim beriw mektepleri yamasa joqarı bilimlendiriwge qabıl etiletuǵın jaslar haqqındaǵı maǵlıwmatlarda tap sonday qáliplesedi. Jasaw jayı haqqındaǵı maǵlıwmatlar bolsa hár birewimizdiń úyimizge deyin keletuǵın jollar qurılısı, kommunikaciyalar menen támiyinlewdi joybarlaw ushın zárúr. Mámleketimizde sınaq jolı menende bıyılǵı jıldan baslanǵan xalıqtı dizimge alıw jumısları 2023-jılda ótkeriletuǵın tiykarǵı ilájǵa tayarlıqtıń zárúrli basqıshı bolıp tabıladı. Usı ámeliyat stilistikalıq, texnikalıq hám shólkemlestirilgen máselelerdi qayta kórip shıǵıw imkaniyatın bergeni sebepli, ol jaǵdayda qansha kóp respondent (xalıq ) qatnassa, sonsha kóp kemshiliklerdi anıqlaw hám ońlawǵa shárayat tuwıladı, ilajdıń sapalı hám nátiyjeli ótkeriliwi támiyinlenedi.
Bul islerdi orınlaw maqsetinde orınlarda arnawlı gruppalar islengen bolıp, prosessler anıq hám sistemalı jolǵa qoyıladı. Dizimge alıwshılar jumısın muwapıqlastırıw ushın hár bir uchastkada 1 dana instruktor hám 1 dana statsionar dizimge alıwshı iskerlik júrgizedi. Olardıń jumısın dizimge alıw uchastkası xızmetkerleri qadaǵalaydı. Jasap turǵan xojalıǵında (jayında ) dizimnen ótiwdi qálemegen respondentler statsionar uchastkaları arqalı dizimnen ótiw múmkinshiligine ie boladı. Rayon hám qala kólemindegi jumıslardı baqlaw ushın aymaqlarda xalıqtı dizimge alıw bólimleri iskerligi jolǵa qoyıladı. Prosess juwmaqlanǵannan keyin aymaqlıq statistika basqarmaları janında xalıqtı dizimge alıwdıń baslanǵısh maǵlıwmatların elektron bazaǵa kirgiziw orayları shólkemlestiriledi. Áhmietli tárepi sonda, bul ilájlar arqalı tek-ǵana ózimiz, bálkim keleshek áwlad ushın zárúrli maǵlıwmatlardı toplawǵa erisemiz. Xalıqtı dizimge alıw nátiyjeleri mámleketimizdiń keyingi demografikalıq jáne sosiallıq siyasatın belgilew menen birge, respublika hám aymaqlardı sosiallıq-ekonomikalıq rawajlandırıw prognozları hám programmaların dúziwde keń qollanıladı. Mámlekettegi jumıs beretuǵınlar haqqında dizimge alıw nátiyjesinde qáliplestiretuǵın maǵlıwmatlar jeke isbilermenlikti rawajlandırıw hám xoshametlewge jol ashadı. Biznes wákilleri dizimge alıw maǵlıwmatları arqalı miynet hám tutınıw bazarınıń jaǵdayın bahalaw, talap hám usınıslar zárúriyatın anıqlaw múmkinshiligine ie boladı. Bir sóz benen aytqanda, xalıq haqqında toplantuǵın maǵlıwmatlar barlıq tarawlardı rawajlandırıp, jáhán maydanında jańa Ózbekstannıń jańasha túsin sáwlelendiriwshi faktor bolıp xızmet etedi.
Rayonlıq stastistika bólimi
